İctimai Televiziyanın "Sağlam yaşamaq" verilişində qaraciyər xəstəlikləri, virus hepatitləri və bu orqanın fəaliyyətinə mənfi təsir göstərən amillər barədə danışdım. Qaraciyərin vəziyyətinə təsir edən müxtəlif stress faktorları mövcuddur ki, bunlara diqqət yetirmək olduqca vacibdir.
Qaraciyər xəstəlikləri və virus hepatitləri
Məsələn, ultrasəs müayinəsi zamanı həkim qaraciyərin piyli olduğunu bildirirsə, bu artıq bizim üçün bir stress faktordur, yəni piylənmədir. Bununla yanaşı, qanda hepatit B, C və ya D xəstəliyinin olması da ciddi fəsadlara yol açır. Orqanizmdə ən çox fəsad verən, ən çox xronikləşən və sirroza gətirib çıxaran məhz bu viruslardır. Klassifikasiyaya görə də sirrozların yaranma səbəbləri arasında virus hepatitləri birinci yerdə durur.
Digər zərərli amillər
Qaraciyərə təsir edən digər amillər də var. Məsələn, xəstənin mütəmadi olaraq alkoqol qəbul etməsi və ya orqanizmdə gedən autoimmun proseslər buna misaldır. Mənə müraciət edən elə xəstələr var idi ki, onlarda ALT və AST göstəriciləri heç cür aşağı düşmürdü.